377. VERSUS 7, 8 Et cum aperuisset sigillum quartum, audivi vocem quarti animalis dicentem, Veni et aspice. Et vidi, et ecce equus pallidus, et sedens super illo nomen illi mors, et infernus sequebatur cum illo, et data illis potestas interficiendi super quartam partem terrae in romphaea et in fame et in morte, et a feris terrae." 7. "Et cum aperuisset sigillum quartum," significat praedictionem manifestatam ulterius (n. 378); "audivi vocem quarti animalis dicentem," significat e caelo intimo a Domino (n. 379); "Veni et aspice," significat attentionem et perceptionem (n. 380). 8. "Et vidi, et ecce equus pallidus," significat intellectum Verbi nullum, ex malis vitae et inde falsis tunc (n. 381); "et sedens super illo," significat Verbum (n. 382); "nomen illi mors, et infernus sequebatur cum illo," significat damnationem aeternam (n. 383); et data illis potestas interficiendi super quartam partem terrae," significat deprivationem omnis boni et inde veri ex Verbo, et inde in doctrina ecclesiae eorum ex Verbo (n. 384); "in romphaea," significat per falsum (n. 385); "et in fame," significat per deprivationem, defectum, et ignorantiam cognitionum veri et boni (n. 386); "et in morte," significat inde exstinctionem vitae spiritualis (n. 387); "et a feris terrae," significat mala vitae, seu cupiditates et inde falsitates oriundas ab amore sui et mundi, quae vastant omnia ecclesiae apud hominem (n. 388).