561. (Vers. 14.) "Et datae sunt Mulieri duae alae aquilae magnae, ut volaret in desertum in locum suum," significat Divinam circumspectionem pro Ecclesia illa, ac tutelam dum adhuc est inter paucos. - Per "Mulierem" significatur Nova Ecclesia (n. 533); per "alas" significatur potentia et tutela (n. 245); per "aquilam" significatur visus intellectualis et inde cogitatio (n. 245); per "volare" significatur perspicere et circumspicere (n. 245); per "desertum" significatur Ecclesia desolata, et sic inter paucos (n. 546); per "locum" significatur status ibi. Ex his sequitur, quod per "datae sunt Mulieri duae alae aquilae magnae ut volaret in desertum in locum suum" significetur Divina circumspectio pro Nova Ecclesia, ac tutela dum adhuc est inter paucos.