718. (Vers. 1.) "Et venit unus ex septem Angelis habentibus septem phialas, et locutus cum me, significat nunc influxum, et revelationem a Domino ex intimo Caeli de Religioso Catholico Romano. - Hactenus de statu Ecclesiae Reformatorum in fine ejus actum est nunc de statu Religiosi Romano Catholici in fine ejus agitur; hoc etiam sequitur in ordine, de quo in Prologo. Non dicitur Ecclesia Catholica Romana, sed Religiosum Catholico Romanum, quia non adeunt Dominum, nec legunt Verbum, et quia mortuos invocant; et Ecclesia est Ecclesia ex Domino et ex Verbo, et ejus perfectio secundum agnitionem Domini, et secundum intellectum Verbi. Quod unus ex septem Angelis habentibus septem phialas venerit et locutus sit cum Johanne, est quid per "septem Angelos habentes septem phialas" significatur influxus a Domino ex intimo Caeli Christiani in Ecclesiam ad detegendum mala et falsa ibi (videatur supra, n. 672, 676, 677, 683, 690, 691, 699, 700); hic itaque per septem illos Angelos significatur Dominus ex intimo Caeli loquens et revelans in quo statu est Religiosum Catholico Romanum in fine ejus: inde etiam est, quod unus ex septem illis Angelis sumpserit Johannem super montem altum, et ostenderit illi Uxorem Agni, quae est Nova Hierosolyma (cap. xxi. 9, 10).