832. (Vers. 18.) "Ut comedatis carnes regum, et carnes chiliarchorum, et carnes fortium, et carnes equorum et sedentium Super illis et carnes (omnium) liberorum et servorum, et parvorum et magnorum," significat appropriationem bonorum a Domino per vera Verbi et doctrinae inde, in omni sensu, gradu et genere. - Nunc supra (n. 831) actum est de conjunctione cum Domino per Verbum; hic de appropriatione bonorum ab Ipso per vera Verbi: per "comedere" significatur appropriatio (n. 89): per "carnes" quas comederent, significantur bona Verbi et inde Ecclesiae: ac per "reges, chiliarchos, fortes, equos, sedentes super illis, liberos et servos, minores et majores" significantur vera in omni sensu, gradu et genere; per "reges" significantur qui in veris Ecclesiae ex Verbo sunt, et abstracte vera Ecclesiae ex Verbo (n. 20, 483); per "chiliarchos" significantur qui in cognitionibus boni et veri sunt, et abstracte cognitiones illae (n. 337); per "fortes" significantur qui in eruditione ex doctrina e Verbo sunt, et abstracte eruditio inde (n. 337); per "equos" significatur intellectus Verbi, et per "insidentes super equis" significantur qui in sapientia ex intellectu Verbi sunt, et abstracte sapientia inde (n. 298, 820); per "liberos et servos" significantur qui ex se sciunt et qui ex aliis (n. 337, 604); per "parvos et magnos" significantur qui in minori et majori gradu (n. 527, 810). Ex his patet, quod per "comederent carnes illorum" significetur appropriatio bonorum a Domino per vera Verbi et doctrinae inde in omni sensu, gradu et genere. Sciendum est quod non aliquod bonum spirituale sit ulli homini a Domino quam per vera ex Verbo: vera enim Verbi sunt in luce Caeli, et bona sunt in calore illius lucis; quare nisi intellectus sit in luce Caeli per Verbum, non potest voluntas venire in calorem Caeli. Amor et charitas non potest formari quam per vera ex Verbo; non potest homo reformari quam per vera inde. Ipsa Ecclesia apud hominem formatur per illa, sed non per vera illa in solo intellectu, sed per vitam secundum illa; ita intrant vera in voluntatem, et fiunt bona; vertitur sic facies veri in faciem boni: quod enim est voluntatis et sic amoris, hoc vocatur bonum; et omne quod voluntatis seu amoris est, id etiam vitae hominis est. Ex his videri potest, quod appropriatio boni per vera in omni sensu, gradu et genere, per Verbum a Domino, hic per "comedere carnes" illorum qui nominantur, intelligatur. Quis non potest videre quod non carnes per "carnes" hic intelligantur; quis potest tam insanus esse, ut credat quod Dominus vocet et convocet omnes ad magnam Caenam, ut det illis comedere carnes regum, chiliarchorum, fortium, equorum, insidentium illis, liberorum et servorum, parvorum et magnorum; quis non videre potest, quod in his Sensus spiritualis sit, et quod absque illo Sensu nemo sciat quid haec significant; quis sustinet negare quin Verbum in sinu spirituale sit; annon id plus quam materiale foret, si illa secundum Sensum literae, et non secundum Sensum spiritualem, intelligerentur. Similia illis sunt haec apud Ezechielem: