591. (Vers. 10.) "Si quis captivitatem duxerit in captivitatem abibit," significat quod qui per haereticum illud alios a bene credendo et a bene vivendo abducit, a suismet falsis et malis in Infernum abducatur. - Per "captivitatem ducere" significatur persuadere et in partes suas trahere, ut haeresi isti, quae per "Draconem" et "Bestiam" intelligitur, consentiant et adhaereant, et sic abducere a bene credendo et a bene vivendo; per "in captivitatem abire" significatur a suismet falsis et malis abduci in Infernum: per "captivitatem" hic intelligitur captivitas spiritualis, quae est seduci, et sic abduci a veris et bonis, ac induci in falsa et mala. Quod per "captivitatem" in Verbo intelligatur captivitas illa spiritualis, constare potest a sequentibus locis:
"Audite omnes populi, et videte dolorem meum, virgines meae et juvenes mei iverunt in Captivitatem" (Thren. i. 18);
"Deus deseruit Habitaculum et Tentorium Suum, ubi habitavit inter homines, et dedit in captivitatem robur ejus" (Psalm. lxxviii. 60, 61);
"Omnes Pastores tuos pascet ventus, et amasii tui in Captivitatem abibunt; tunc pudefies ob omnem malitiam tuam" (Jerem.xxii. 22{1});
"Ebria faciam tela Mea, a sanguine confossi et Captivitatis" (Deut. xxxii. 42);
"Inflexi sunt et incurvati, et anima eorum in Captivitatem abibit" (Esaj. xlvi. 1, 2); "Jehovah misit Me ad obligandum fractos corde, ad praedicandum Captivis libertatem, et Vinctis, oculis capto" (Esaj. lxi. (1); Luc. iv. 18, 19);
"Ego excitabo Illum in justitia; Ille Captivitatem Meam dimittet, non pretio neque munere" (Esaj. xlv. 13);
"Ascendisti in altum, Captivam duxisti Captivitatem" (Psalm. lxviii. 19 (B.A. 18));
"Num Captivitas justi eripietur, etiam Captivitas fortis sumetur, e Captura violenti eripietur" (Esaj. xlix. 24, 25);
"Excute te e pulvere, sede Hierosolyma, aperire vinculis colli tui Captiva filia Sionis" (Esaj. lii. 2{2}). (Praeter alibi, ut Jerem. xlviii. 46, 47; cap. 1. 33, 34; Ezech. vi. 1-10; cap. xii. 1-12; Obad. i. 11; Psalm. xiv. 7; Jerem.{3} 1. 33, 34; Psalm. liii. 7 (B. A. 6).) Per captivitates filiorum Israelis ab hostibus suis, de quibus in libro Judicum, et 2 Reg. xxv.{4} et apud prophetas, repraesentatae sunt et inde significatae captivitates spirituales, de quibus alibi. Simile quod per "captivos" etiam significatur per "vinctos" in sequentibus locis:
"Per sanguinem foederis tui emittam Vinctos e fovea" (Sach. ix. 11);
"Veniet ad te gemitus Vincti" (Psalm. lxxix. II);
"Colligetur Vinctus in fovea, et claudentur in claustro" (Esaj. xxiv. 22);
"Posuit Orbem in desertum, Vinctis suis non aperuit domum" (Esaj. xiv. 17{5});
"Rex dixit, "In carcere fui, et non venistis ad me " (Matth. xxv. 36. 43{6}); Jesus dixit, "Hanc filiam Abrahami, quam Vinxit Satanas, nonne oportet solvi e vinculo hoc die Sabbathi" (Luc. xiii. 16). @1 22 pro "12"$ @2 2 pro "1, 2"$ @3 Jerem. pro "Psalm." (Hic est iteratio; vide mox supra.)$ @4 xxv. pro "xxx."$ @5 17 pro "7"$ @6 43 pro "36"$
This page is part of 
© 2000-2001 The Academy of the New Church