244. "Ne appareat pudor nuditatis tuae."--Quod significet ne spurci amores, constat ex significatione "nuditatis," quod sit deprivatio ab intellectu veri et boni quia voluntate illorum, seu deprivatio veri quod fidei quia non bonum quod amoris (de qua supra, n. 240(a)); et quia per "nuditatem" illa deprivatio significatur, ideo per "pudorem nuditatis" significantur spurci amores, hi enim apparent quando non sunt remoti per amorem boni et inde fidem veri. Homo enim nascitur in binos amores, qui sunt amor sui et amor mundi; quare ex hereditario trahit ut se et mundum super omnia amet: hi amores sunt amores spurci quia ex illis omnia mala fluunt, quae sunt contemptus aliorum prae se, inimicitia contra illos qui sibi non favent, odia, vindictae, astus, doli omnis generis. Illi amores cum suis malis non removeri possunt quam a binis amoribus, qui sunt amor in Dominum et amor erga proximum; ex his trahit homo ut Dominum super omnia amet et proximum sicut se ipsum; hi duo amores sunt amores puri, quoniam e caelo a Domino; ex his etiam omnia bona fluunt: quantum itaque homo in his est, tantum removentur amores illi spurci in quos natus est, usque ut non appareant, et removentur per vera a Domino. Ex his constare potest quod per "Suadeo tibi emere a Me...vestimenta alba, ut induaris ne appareat pudor nuditatis tuae," significetur ut comparent sibi genuina vera et inde intelligentiam a Domino, ne appareant spurci amores.