[2] Quod "thus" in Verbo significet bonum spirituale, similiter "thuribulum" quod erat continens (ubi continens sumitur pro contento), constare potest a sequentibus locis: - Apud Esaiam, "Non servire te feci per mincham, nec defatigavi per thus" (xliii. 23):

"mincha" et "thus" dicitur, quia per "mincham," quae erat ex similagine, ita panis, significatur bonum caeleste; quare per "thus" significatur bonum spirituale: quod utrumque dicatur, est quia ubivis in Verbo est conjugium boni et veri, hoc est, ubi agitur de bono etiam agitur de vero, et bonum spirituale est in sua essentia verum; ex hoc patet quod "thus" sit bonum spirituale, seu verum boni caelestis. Hoc adhuc constare potest ex aliis locis ubi simul "mincha" et "thus" dicitur: - Ut apud eundem, "Ascendere faciens mincham,...offerens thus" (lxvi. 3):

[3] apud Jeremiam, "Offerent holocaustum et sacrificium, mincham et thus" (xvii. 26):

etiam "holocaustum" significat cultum ex bono amoris caelestis, et "sacrificium" cultum ex bono amoris spiritualis; quae duo bona etiam significantur per "mincham" et "thus." Similiter "mincha" et "suffimentum," nam suffimentum primario erat ex thure: - Apud Malachiam, "In omni loco suffimentum allatum nomini meo et mincha munda" (i. 11):

apud Davidem, "Acceptae sunt preces meae, suffimentum coram Te, sublatio manuum mearum mincha vesperae" (Ps. cxli. 2). Ideo Super mincham effundebatur oleum, et dabatur thus (Levit. ii. 1, 2, 15), et hoc propterea, ut per mincham repraesentaretur conjunctio boni caelestis et boni spiritualis, "oleum" enim significabat bonum caeleste, et "thus" bonum spirituale.

[4] Ideo etiam Super panes facierum in Tabernaculo dabatur thus (Levit. xxiv. 7). et hoc quoque propter conjunctionem utriusque boni; "panes" enim significabant bonum caeleste, et "thus" bonum spirituale; quare cum thus datum erat super panes, repraesentabatur conjunctio utriusque boni: propter repraesentationem conjunctionis boni caelestis et boni spiritualis, in Tabernaculo posita erat mensa pro panibus, et ab altero latere positum erat altare pro suffitionibus.

[5] Ubi non mincha et thus dicitur, dicitur "oleum et thus," ac "aurum et thus," quoniam per "oleum" et "aurum" similiter ac per "mincham" significatur bonum caeleste. Dicitur "oleum, et suffimentum" apud Ezechielem, "Sumpsisti....oleum meum, et suffimentum meum, et dedisti coram illis" (xvi. 18):

"aurum et thus," apud Esaiam, "Omnes e Scheba venient, aurum et thus portabunt, et laudes Jehovae annuntiabunt" (lx. 6);

et apud Matthaeum, Sapientes ab oriente, qui venerunt ad christum recens natum, aperuerunt thesauros, et "obtulerunt munera, aurum, thus et myrrham" (ii. 11):

"aurum" significabat bonum caeleste, "thus" bonum spirituale, et "myrrha " bonum naturale inde; ita tria bona trium caelorum. Ex his nunc constare potest quid significat quod visus sit angelus ad altare, habens thuribulum aureum, "altare" enim erat repraesentativum boni caelestis, et "thuribulum" repraesentativum boni spiritualis, et utrumque simul repraesentativum conjunctionis boni caelestis cum bono spirituali; seu quod idem, repraesentativum conjunctionis caelorum superiorum, seu caeli ubi angeli caelestes cum caelo ubi angeli spirituales.