679. VERSUS 14, 15. "Vae secundum praeteriit; ecce vae tertium venit cito. Et septimus angelus clanxit et factae sunt voces magnae in caelo, dicentes, Facta sunt regna mundi Domini nostri et Christi Ipsius, et regnabit in saecula saeculorum. 14. "Vae secundum praeteriit: ecce vae tertium venit cito," significat lamentationem super vastationem ultimam ecclesiae, nunc certo instantem [n. 680]. 15. "Et septimus angelus clanxit, significat influxum Divini Veri per caelos a Domino, et inde ultimas mutationes [n. 681]; "et factae sunt voces magnae in caelo," significat in caelis superioribus illustrationem et gaudium [n. 682]; "dicentes, Facta sunt regna mundi Domini nostri et Christi Ipsius," significat omnia in caelis et in terris subjecta Domino, quando separati sunt mali a bonis, ac Divinum Bonum et Divinum Verum procedens a Domino clare recipitur [n. 683, 684]; "et regnabit in saecula saeculorum," significat dominium Ipsius per Divinum Verum in aeternum [n. 685].