67. Spiritus Joviales in quam clara perceptione de rebus spiritualibus sunt, constare mihi potuit ex repraesentatione illorum, quomodo Dominus convertit pravas affectiones in bonas: repraesentabant Mentem intellectualem ut formam pulchram, ac ei indebant activitatem formae convenientem pro affectionis vita: quod fecerunt modo qui vocibus describi nequit, tam dextre ut collaudati ab angelis. Aderant tunc eruditi ex nostra Tellure, qui intellectuale immerserant terminis scientificorum, et multa scripserunt et cogitaverunt de forma, de substantia, de materiali et immateriali, et de similibus, ac talia ad nullum usum applicuerunt; hi ne quidem repraesentationem illam comprehendere potuerunt.