704. Quod per "Carnem" ibi non intelligatur caro, nec per "Sanguinem" sanguis, quisque e caelo illustratus in se percipere potest: sed quod per utrumque in sensu naturali intelligatur Passio crucis, cujus recordarentur: quare dixit, cum hanc ultimi Paschatis Judaici, et primi Paschatis Christiani Cenam instituit, "Hoc facite in Mei recordationem" (Luc. xxii. 19; 1 Corinth. xi. 24, 25). Similiter, quod per "Panem" non intelligatur panis, nec per "Vinum" vinum, sed in naturali sensu simile quod per "Carnem" et "Sanguinem," videlicet Passio crucis Ipsius: nam legitur, "Jesus.... panem fregit, et dedit discipulis, et dixit Hoc est Corpus meum; et accipiens poculum, ....et dedit illis, dicens, .... Hoc est Sanguis meus" (Matth. xxvi. [26-28]; Marc. xiv. [22-24]; Luc. [1]xxii. [19, 20]). Quare etiam Passionem crucis vocavit "poculum" (Matth. [xxvi. 39, 42, 44; [2]Marc.] xiv. 36; Joh. xviii. 11).