280. Quod peccata cum remissa sunt etiam sint remota, est quoque error saeculi. In illo errore sunt, qui credunt per Sacramentum Cenae sibi remissa esse peccata, tametsi non removerunt illa a se per paenitentiam: in illo etiam sunt, qui per solam fidem credunt salvari tum etiam qui per dispensationes papales: omnes illi credunt immediatam misericordiam, et momentaneam salvationem. At cum hoc invertitur, fit veritas, nempe quod cum remota sunt peccata, etiam remissa sint; paenitentia enim praecedet remissionem, et absque paenitentia nulla est remissio: quare Dominus mandavit discipulis ut Praedicarent paenitentiam in remissionem peccatorum (Luc. xxiv. {1}47): Et Johannes "praedicavit baptisma paenitentiae in remissionem peccatorum" (Luc. iii. 3) Dominus remittit omnibus sua peccata; non arguit et imputat sed usque non potest nisi secundum leges Divinae Providentiae suae illa auferre; nam cum dixit Petro (interroganti quoties remitteret fratri in illum peccanti, num septies), Quod remitteret non modo septies, sed usque ad septuagies septies (Matth. xviii. 21, 22);