"Propter Zionem non tacebo, et propter Hierosolymam non quiescam, usque dum exeat sicut splendor justitia ejus, et salus ejus sicut lampas ardeat. Tunc videbunt gentes justitiam tuam, et omnes reges gloriam tuam. Et vocabitur tibi nomen novum, quod os Jehovae enuntiabit. Et eris corona decoris in manu Jehovae, et cidaris regni in manu Dei tui. ...Beneplacebit Jehovah in te, et terra tua maritabitur. ...Ecce Salus tua veniet, ecce merces Ipsius cum Ipso Et vocabunt illos. Populus sanctitatis, Redempti Jehovae: et tu vocaberis quaesita urbs, non deserta" (lxii. 1-4, 11, 12):

agitur in toto illo capite de adventu Domini, et de nova ab Ipso instauranda ecclesia: nova haec ecclesia est quae intelligitur per "Hierosolymam," cui "vocabitur nomen novum quod os Jehovae enuntiabit," quaeque "erit corona decoris in manu Jehovae, et cidaris regni in manu Dei," in qua "Jehovah beneplacebit," et quae vocabitur "urbs quaesita, non deserta:" per haec non potest intelligi Hierosolyma, in qua, cum Dominus in mundum venit, fuerunt Judaei, nam illa erat in omni contrario; quae potius vocanda erat Sodoma, ut quoque vocatur (Apoc. xi. 8: (vide etiam) Esai. iii. 9; Jer. xxiii. 54; Ezech. xvi. 46, 48). [3] Alibi apud Esaiam, "Ecce Ego creans caelum novum, et terram novam:,.. non commemorabuntur priora. ...Laetamini et exultate in aeternitates, quae Ego creans. Ecce... Ego creaturus Hierosolymam exsultationem, et populum ejus laetitiam, ut exsultem super Hierosolyma, et laetet super populo meo. ...Tunc lupus et agnus pascent simul:... non malum facient... in toto monte sanctitatis meae" (lxv. 17-19, 25):

etiam in hoc capite agitur de adventu Domini, et de ecclesia ab Ipso instauranda; quae non instaurata est apud illos qui in Hierosolyma, sed apud illos qui extra illam erant: quare haec ecclesia intelligitur per "Hierosolymam," quae erit Domino exsultatio, et cujus populus erit Ipsi laetitia; tum ubi lupus et agnus pascent simul; et ubi non malum facient. Hic quoque dicitur, quemadmodum in Apocalypsi, quod Dominus creaturus novum terram novam," per quae etiam similia intelliguntur; et quoque dicitur quod creaturus "Hierosolymam." [4] Alibi apud Esaiam, "Excitare, excitare, indue robur tuum, Zion; indue vestes decoris tui, Hierosolyma, urbs sanctitatis; quia non addet ut veniat in te amplius praeputiatus et immundus. Excute te e pulvere, surge, sede, Hierosolyma. ...Cognoscet populus nomen meum... in die illo nam Ego ille qui loquens, ecce Me. ...Consolatus est Jehovah populum suum, redemit Hierosolymam" (lii. 1, 2, 6, 9):

etiam in eo capite agitur de adventu Domini, et de ecclesia ab Ipso instauranda; quare per "Hierosolymam," in quam non amplius veniet praeputiatus et immundus, et quam Dominus redimet, intelligitur ecclesia; et per "Hierosolymam urbem sanctitatis," ecclesia quoad doctrinam a Domino. [5] Apud Zephaniam, "Jubila, filia Zionis;... laetare... ex omni corde, filia Hierosolymae; Rex Israelis... in medio tui: ne time malum amplius. ...Laetabitur super te cum gaudio, acquiescet in amore {2}tuo, exsultabit super te cum jubilo. ...Dabo vos in nomen et in laudem omnibus e populis terrae" (iii. 14-17, 20);

similiter hic de Domino et de ecclesia ab Ipso; super qua (Ut Rex Israelis, qui est Dominus, "laetabitur cum gaudio," "exsultabit cum jubilo," et "in cujus amore requiescet," et quos "dabit in nomen et in laudem omnibus populis terrae." [6] Apud Esaiam, "Sic dixit Jehovah Redemptor tuus, et Formator tuus:... dicens Hierosolymae, Habitaberis; et urbibus Jehudae, Aedificabimini" (xliv. 24, 26):

de et apud Danielem, "Scito... et percipito, ab exitu Verbi usque ad restituendum et ad aedificandum Hierosolymam, usque ad Messiam Principem, septimanae septem" ({3}ix. 25);

quod per "Hierosolymam" etiam hic intelligatur ecclesia, patet, quoniam haec a Domino restituebatur et aedificabatur, non autem Hierosolyma sedes Judaeorum. [7] Per "Hierosolymam" intelligitur ecclesia a Domino etiam in sequentibus locis. Apud Sachariam, "Sic dixit Jehovah, Revertar ad Zionem, et habitabo in medio Hierosolymae: unde vocabitur Hierosolyma, urbs veritatis; et mons Jehovae Zebaoth, mons sanctitatis" (viii, 3, 20-23). Apud Joelem, "Tunc cognoscetis quod Ego Jehovah Deus vester, habitans in Zione, monte sanctitatis...; et erit Hierosolyma sanctitas:... et fiet in die illo, stillabunt montes mustum, et colles fluent lacte;... et Hierosolyma sedebit in generationem et generationem" (iv. 17-21). Apud Esaiam, "In die illo erit germen Jehovae in decus et in gloriam;... et fiet, relictus in Zione, et residuus in Hierosolyma, sanctus dicetur...: omnis scriptus ad vitam in Hierosolyma" (iv. 2, 3). Apud Micham, "In extremitate dierum erit mons domus Jehovae constitutus in caput montium;... nam e Zione exibit Doctrina, et Verbum Jehovae ex Hierosolyma:... ad te veniet regnum prius, regnum filiae Hierosolymae" ({4}iv. 1, 2, 8). Apud Jeremiam, "In tempore illo vocabunt Hierosolymam thronum Jehovae; et congregabuntur... omnes gentes ob nomen Jehovae Hierosolymam; neque ibunt amplius post confirmationem cordis sui mali" (iii. 17). Apud Esaiam, "Specta Zionem urbem festi stati nostri; oculi tui videant Hierosolymam, habitaculum tranquillum, tabernaculum quod non dissipabitur; non removebuntur clavi ejus in perpetuum, et omnes funes ejus non avellentur" (xxxiii. 20). Praeter etiam alibi (Ut apud Esaiam, xxiv. 23; cap. xxxvii. 32; cap. lxvi. 10-14; apud Sachariam, xi. 3, 6, 8-10; cap. xiv. 8, 11, 12, 21: apud Malachiam, iii. 2, 4: apud Davidem, Ps. cxxii. 1-7; Ps. cxxxvii. 4-6). [8] Quod per "Hierosolymam" in illis locis intelligatur ecclesia, quae a Domino instauranda erat, et quae etiam instaurata est, et non Hierosolyma in terra Canaane a Judaeis habitata, constare etiam potest a locis in Verbo, ubi de hac dicitur quod prorsus deperdita sit, et quod destruenda:

Ut Jerem. v. 1; cap. vi. 6, 7; cap. vii. 17, 18, seq.; cap. viii. 6-8 seq.; cap. ix. 10, 11, 13, seq. (B.A. 11, 12, 14, seq.); cap. xiii. 9, 10, 14; cap. xiv. 16: Thren. i. 8, 9, 17: Ezech. iv. 1 ad fin.; cap. {5}v. 9 ad fin.; cap. xii. 18, 19; cap. xv. 6-8; cap. xvi. 1-3 cap. xxiii. 1-49: Matth. xxiii. (33,)37, 39: Luc. xix. 41-44 cap. xxi. 20-22; cap. xxiii. 28-30; et multis aliis in locis. @1 Quod per "urbem" in Verbo significetur doctrina ecclesiae et religionis, videatur in Arcanis Caelestibus, n. 402, 2450(? 2449), 2943; 3216, 4492, 4493. Quod per "portam urbis" significetur doctrina per quam fit introitus in ecclesiam, n. 2943, 4477, 4478. Quod ideo seniores sederint in porta urbis et judicaverint, ibid; "Egredi porta" quod sit recedere a doctrina, n. 4492, 4493. Quod urbes et palatia in caelo repraesententur. quando angelis est sermo de doctrinalibus, n. 3256, ibi.$ @2 "tuo:--sic editio princeps; sic quoque, Apoc. Rev. n. 880; Summ. Expos. Doctrinae, n. 100; V.C.R., n. 782. Vide autem Dict. Prob., ed. 1845, p. 31, ubi legitur "suo," quod textum Hebraicum rectius interpretatur.$ @3 ix. pro "x."$ @4 iv. pro "ii."$ @5 v. pro "iv"$