204. Vers. 4, 5. Et dixit serpens ad mulierem, Non moriendo morimini. Quia novit Deus, quod in die quo editis de eo, et aperiantur oculi vestri, et sitis sicut Deus, scientes bonum et malum. 'Si ederent ex fructu arboris quod aperirentur oculi' significat si ex sensuali et scientifico, hoc est, a semet scrutarentur illa quae sunt fidei, quod manifeste viderent res se non ita habere: quod 'essent sicut Deus, scientes bonum et malum' significat si ita ex semet, quod forent sicut Deus ac semet ipsos ducere possent.