4643. Vers. 2-5. Esau accepit feminas suas e filiabus Canaan, Adam filiam Elonis Hittaei, et Oholibamam filiam Anae filiae Zibeonis Hivaei. Et Basematham filiam Jishmaelis, sororem Nebaioth. Ee peperit Adah Esavo Eliphazum, et Basemath peperit Reuelem. Et Oholibamah peperit Jeushum, et Jaelam, et Korahum; hi filii Esavi, qui nati ei in terra Canaan. `Esau accepit feminas suas e filiabus Canaan' significat Boni Naturalis primam conjunctionem cum affectione apparentis veri: `Adam filiam Elonis Hittaei, et Oholibamam filiam Anae filiae Zibeonis Hivaei' significat quale quod ex Antiqua Ecclesia: `et Basematham filiam Jishmaelis, sororem Nebaioth' significat alteram conjunctionem cum affectione veri ex stirpe Divina: `et peperit Adah Esavo Eliphazum, et Basemath peperit Reuelem' significat primas derivationes inde: