6390. `Cubans inter sarcinas': quod significet vitam inter opera, constat a significatione `cubare' quod sit vita sed vita obscura; et ex significatione `sarcinarum' quod sint opera; quod sarcinae sint talia opera, est quia non ex affectione amoris erga proximum bona faciunt sed ex affectione amoris erga se; opera quae ex hujus amoris affectione fluunt, sunt sicut sarcinae quas viliores asini portant, nam sunt servitia inter vilissima: {1}omne enim servum est ex affectione amoris sui et mundi, ac omne liberum (c)ex affectione amoris in Dominum et erga proximum; causa est quia illius amoris affectio influit ab inferno, quod violenter imperat; at hujus amoris affectio a Domino, Qui non imperat sed ducit; inde iterum patet quod qui bonum faciunt remunerationis causa, sint servitia infima, et illorum opera `sarcinae'. Per sarcinas simile significatur in Libro Judicum,

Principes in Jisaschar cum Debora, et Jisaschar sic cum Barako, in valle mittetur sub pedibus ejus, in classibus Reubenis magni statuta cordis: quare sederes inter sarcinas, ad audiendum exsibilationes gregum? v 15, 16;