Planeta Martis apparet in idea spirituum et angelorum sicut ceterae planetae, in suo loco constanter, et quidem ad sinistrum antrorsum ad aliquam distantiam in plano pectoris; et sic extra sphaeram ubi sunt spiritus nostrae telluris. Spiritus unius telluris separati sunt a spiritibus alius telluris, ex causa quia spiritus cujusvis telluris referunt aliquam peculiarem provinciam in Maximo Homine, ac inde in alio et diverso statu sunt; et diversitas status facit ut a se mutuo vel ad dextrum vel ad sinistrum, ad distantiam majorem vel minorem, separati appareant.