7896. (x) Vers. 17-20. Et observabitis azyma, quia [in] eodem die hoc eduxi exercitus vestros e terra Aegypti, et custodietis diem hunc generationibus vestris statuto aeterno. In primo, in quartodecimo die mensis in vespera comedetis azyma, usque ad diem primum et vicesimum mensis in vespera. Septem diebus fermentum non invenietur in domibus vestris, quia omnis comedens fermentatum, et exscindetur anima illa e coetu Israelis, in peregrino et in indigena terrae. Nullum fermentatum comedetis, in omnibus habitationibus vestris comedetis azyma. `Et observabitis azyma' significat quod nullum falsum erit: `quia in eodem die hoc eduxi exercitus vestros e terra Aegypti' significat quia status tunc charitatis et fidei, per quem separatio ab illis qui in malis et falsis: `et custodietis diem hunc generationibus vestris statuto aeterno' significat cultum ex fide et charitate secundum ordinem {1}Divinum: `in primo, in quartodecimo die mensis' significat in principio sancti status: `in vespera' significat finem status prioris et principium novi: `comedetis azyma' significat appropriationem veri a bono purificati a falso: `usque ad diem primum et vicesimum mensis' significat finem status illius sancti: `in vespera' significat finem status prioris et principium novi: `septem diebus' significat integram periodum hujus status: `fermentum non invenietur in domibus vestris' significat quod prorsus nihil falsi accedet ad bonum: `quia omnis comedens fermentatum, et exscindetur anima illa e coetu Israelis' significat quod qui bono suo adjungit falsum damnatus sit: `in peregrino et in indigena terrae' significat qui ab Ecclesia, sive non natus ibi, sive natus ibi: `nullum fermentatum comedetis' significat quod cavendum omnino ne approprietur falsum: `in omnibus habitationibus vestris comedetis azyma' significat quod in interioribus ubi bonum, appropriabitur verum. @1 coeli I$