7982. Vers. 40-42. Et habitatio filiorum Israelis qua habitaverunt in Aegypto, triginta anni et quadringenti anni. Et fuit a fine triginta annorum et quadringentorum annorum, [et] fuit in eodem die hoc, exiverunt omnes exercitus Jehovae e terra Aegypti. Nox custodiarum haec Jehovae, ad educendum illos e terra Aegypti; haec nox ista Jehovae custodiarum omnibus filiis Israelis ad generationes illorum. `Et habitatio filiorum Israelis qua habitaverunt in Aegypto' significat infestationum durationem: `triginta anni et quadringenti anni' significat quale (x)et statum illarum: `et fuit a fine triginta annorum et quadringentorum annorum' significat tempus Adventus Domini cum liberati: `et fuit in eodem die hoc' significat quod tunc: `exiverunt omnes exercitus Jehovae e terra Aegypti' significat quod illi qui in vero et bono, et usque illuc detenti, exempti sint: `nox custodiarum haec Jehovae' significat Domini praesentiam apud illos qui in vero et bono, et apud illos qui in malo et inde in mero falso: `ad educendum illos e terra Aegypti' significat liberationem ex captivitate spirituali: `haec nox ista Jehovae custodiarum' significat quod tunc detenti ab omni falso et malo: `omnibus filiis Israelis ad generationes illorum' significat illos ab Ecclesia spirituali apud quos est bonum ex vero et verum ex bono.