8398. `Et venerunt omnis coetus filiorum Israelis ad desertum Sin': quod significet ad statum alium tentationis, constat ex significatione `venire' quod sit statio successivi quod per `proficisci' n. (x)8397 significatur, ex significatione `coetus filiorum Israelis' quod sint qui ab Ecclesia spirituali, de qua n. 7843, ex significatione `deserti' quod sit status subeundi tentationes, de qua n. 8098, et ex significatione `Sin' quod sit quale illius status, nomina enim includunt omne quale status rei, de qua agitur, ut supra passim ostensum. Ex tentatione {1} quae significatur per murmurationem propter defectum panis et carnis, et ex consolatione dein, quae significatur per `mannam' et `selav,' constare potest quid `Sin' significat, quod nempe bonum quod ex vero; inde Sin, quae urbs Aegypti a qua desertum Sin nomen accepit, in opposito sensu significat malum quod ex falso: apud Ezechielem, Effundam excandescentiam Meam super Sin robur Aegypti, et exscindam multitudinem No; et dabo ignem in Aegypto; dolendo dolebit Sin, et No erit ad perrumpendum, et Noph hostibus quotidie; juvenes Aven et (x)Pi-Beseth gladio cadent, et illae in captivitatem abibunt; et in (x)Thechapneches obtenebratus dies erit, quando fregero ibi juga Aegypti, xxx 15-18;