8586. Vers. 7. Et vocavit nomen loci Massah, et Meribah, propter jurgium filiorum Israelis, et propter tentare illos Jehovam, dicendo, Num est Jehovah in medio nostri, si non? `Et vocavit nomen loci Massah' significat quale status tentationis: `et Meribah' significat querimoniae quale: `propter jurgium filiorum Israelis' significat querimoniam ex gravitate tentationis usque ut prope succumberent: `et propter tentare illos Jehovam' significat quod contra Divinum, de cujus ope desperant: `dicendo, Num est Jehovah in medio nostri?' significat quod prope crederent quod Dominus non suis opem ferat.