2205. Vers. 13. Et dixit Jehovah ad Abraham, Cur hoc risit Sarah, dicendo, Num etiam vere pariam, et ego consenui? `Dixit Jehovah ad Abraham' significat perceptionem Domini ex Divino: `cur hoc risit Sarah?' significat cogitationem veri rationalis ex ejus affectione: `Num etiam vere pariam?' significat quod miratum quod rationale fieret Divinum: `et ego consenui' significat postquam non amplius tale esset.