358. Quod per 'cadere facies' significetur quod interiora mutentur, etiam a significatione 'faciei' et significatione 'cadere' constat; facies apud antiquos significavit interna, quia per faciem interna elucent; tales etiam antiquissimis temporibus fuerunt ut facies prorsus concordaret cum internis, sic ut quisque ex facie videre potuisset qualis animus aut mens ejus esset; pro enormi re ducebant aliud facie ostendere, aliud cogitare; simulatio et dolus tunc fuit abominabilis; quare per 'faciem' significabantur interna; cum charitas elucebat ex facie, tunc dicebatur 'elevari facies'; cum autem contrarium, tunc dicebatur 'facies cadere'; quare etiam de Domino praedicatur quod 'facies elevet super hominem,' ut in Benedictione, Num. vi 26; et Ps. iv 7 [A.V. 6], quo significatur quod Dominus det homini charitatem: quid cadere facies, constat apud Jeremiam, Non faciam cadere faciem Meam erga vos, quoniam misericors Ego, dictum Jehovae, iii 12;