4647. Vers. 15-19. Hi duces filiorum Esavi, filii Eliphazi primogeniti Esavi, dux Teman, dux Omar, dux Zepho, dux Kenaz, dux Korah, dux Gaetam, dux Amalek; hi duces Eliphazi in terra Edom; hi filii Adae. Et hi filii Reuelis filii Esavi, dux Nahath, dux Zerah, dux Shammah, dux Mizzah; hi duces Reuelis in terra Edom; hi filii Basemath uxoris Esavi. Et hi filii Oholibamae uxoris Esavi, dux Jeush, dux Jaelam, dux Korah; hi duces Oholibamae filiae Anae uxoris Esavi. Hi filii Esavi, et hi duces illorum; ipse Edom. `Hi duces filiorum Esavi' significat praecipua Boni Vera: `filii Eliphazi primogeniti Esavi, dux Teman, dux Omar, dux Zepho, dux Kenaz, dux Korah, dux Gaetam, dux Amalek' significat primam classificationem et quale illorum, et qualia etiam sunt in regno Domini: `hi duces Eliphazi in terra Edom, hi filii Adae' significat praecipua primae classis: `et hi filii Reuelis filii Esavi, dux Nahath, dux Zerah, dux Shammah, dux Mizzah' significat alteram classem et quale eorum, sicut in caelo: `hi duces Reuelis in terra Edom' significat secundam classificationem: hi filii Basemath uxoris Esavi' significat ex conjugio Boni et Veri: `et hi filii Oholibamae uxoris Esavi' significat praecipua tertiae classificationis: `dux Jeush, dux Jaelam, dux Korah' significat quale eorum, inde in regno Domini: `hi duces Oholibamae filiae Anae uxoris Esavi' significat praecipua ex conjunctione Boni et Veri; hi duodecim duces sunt sicut duodecim tribus, secundum dispositionem a Bono: `hi filii Esavi, et hi duces illorum' significat quod ex boni veris haec praecipua: `ipse Edom' significat in Divino Humano Domini.