Vers. 1-4. Et postea venerunt Moscheh et Aharon, et dixerunt ad Pharaonem, Ita dixit Jehovah, Deus Israelis, (x)Dimitte populum Meum, et festum agant Mihi in deserto. Et dixit Pharao, Quis Jehovah Cujus audiam vocem, ad dimittendum Israelem? non novi Jehovam, et etiam Israelem non dimittam. Et dixerunt, Deus Hebraeorum occurrit nobis; eamus quaeso viam trium dierum in desertum, et sacrificemus Jehovae Deo nostro, ne forte incidat in nos peste vel gladio. Et dixit ad illos rex Aegypti, Quare, Mosche et Aharon, abstrahitis populum ab operibus ejus? ite ad onera vestra. `Et postea venerunt Moscheh et Aharon' significat Divinam Legem et doctrinam inde: `et dixerunt ad Pharaonem' significat inde exhortationem ad illos qui contra vera Ecclesiae: `Ita dixit Jehovah, Deus Israelis' significat quod ex Divino Humano Domini: `Dimitte populum Meum' significat quod desisterent ab illis infestandis: `et festum agant Mihi in deserto' significat ut ex laeto animo colant Dominum in obscuro fidei in quo sunt: `et dixit Pharao' significat cogitationem contrariam: `Quis Jehovah Cujus vocem audiam' significat de Domino Cujus exhortationi auscultarent: `ad dimittendum populum?' significat ut desistant: `non novi Jehovam' significat quod Dominum non curent: `et etiam Israelem non dimittam' significat quod nec desistent ab infestando: `et dixerunt, Deus Hebraeorum occurrit nobis' significat quod Ipse Deus Ecclesiae mandaverit: `eamus quaeso viam trium dierum in deserto' significat quod erunt in statu prorsus remoto a falsis, tametsi in obscuro fidei: `et sacrificemus Jehovae Deo nostro' significat ut colant Dominum: (m)`ne forte incidat in nos peste et gladio' significat ad evitandum damnationem mali et falsi:(n) `et dixit ad illos rex Aegypti' significat responsum ab illis qui in falsis: `Quare, Mosche et Aharon, abstrahitis populum ab operibus suis?' significat quod illorum Divina Lex et doctrina non eximent illos a gravaminibus: `ite ad onera vestra' significat quod vivent in pugnis.