7370. Ille homo in amore sui est qui proximum contemnit prae se, qui inimicum illum habet si non sibi favet et si non se colit; magis adhuc in amore sui est qui propterea proximum odio habet et persequitur; et magis adhuc qui propterea flagrat vindicta contra illum et cupit ejus perniciem; tales tandem amant saevire contra proximum; et iidem si quoque adulteri sunt, crudeles fiunt.