8992. {1} Vers. 7-11. Et cum vendiderit vir filiam suam ad ancillam, non exibit secundum exire servorum. Si mala in oculis domini sui, ut non desponset eam, et redimatur; populo alienigenae non potestatem habebit vendendi eam; perfide agendo illum in eam. Et si filio suo desponsaverit eam, secundum judicium filiarum faciet ei. Si alteram acceperit sibi, victum ejus, tegumentum ejus, et debitum conjugiale ejus non diminuet. Et si tria haec non fecerit ei, et exibit gratis nullo argento. `Et cum vendiderit vir filiam suam ad ancillam significat affectionem veri ex jucundo naturali: `non exibit secundum exire servorum' significat statum non similem vero absque affectione: `si mala in oculis domini sui' significat si affectio veri ex jucundo naturali non concordet cum vero spirituali: `ut non desponset illam' significat ut conjungi nequeat: `et redimatur' significat abalienationem ab illis veris: `populo alienigenae non potestatem habebit vendendi illam' significat non illis qui non ex fide Ecclesiae: `perfide agendo illo in eam' significat id contra leges ordinis Divini: `et si filio suo desponsaverit eam' significat si concordet cum vero aliquo derivato ut possit ei conjungi: `secundum judicium filiarum faciet ei' significat quod sicut affectio veri genuina erit: `si alteram acceperit sibi' significat conjunctionem cum affectione veri ex alia stirpe: `victum ejus, tegumentum ejus, et debitum conjugiale [ejus] non diminuet' significat non deprivationem vitae interioris, quae est `victus,' nec vitae exterioris, quae est `amictus,' ita non deprivationem conjunctionis, quae est `debitum conjugiale': `[et] si tria haec non fecerit ei' significat deprivationem illorum: `exibit gratis nullo argento' significat abalienationem inde absque vero ei conjuncto. @1 See p. 312, note 6. P here reads: 7. Et cum vendiderit vir filiam suam ad ancillam, significat bonum ex vero in naturali, quod serviturum spirituali: non exibit secundum exire servorum, significat quod ejus cum vero non erit sicut veri cum bono. 8. Si mala in oculis domini sui, significat si non convenit spirituali:, ut non possit conjungi: et redimatur, significat restitutionem vero a quo: populo alienigenae non potestatem habebit vendendi eam, significat non addicationem ad vera extra Ecclesiam:perfide agendo illum in eam, significat quod hoc contra Divinum ordinem. 9. Et si filio suo desponsaverit eam,significat initionem et conjunctionem cum vero ex spirituali: secundum judicium filiarum faciet ei, significat quod tunc agnoscendum a spirituali ut bonum ex se. 10. Si alteram acceperit sibi, significat conjunctionem veri etiam cum bono collaterali; victum ejus, tegumentum ejus, et debitum conjugiale ejus, non diminuet, significat quod non abstrahenda a bono illo quae inservitura vitae ejus conservationi. 11. Et si tria haec non fecerit ei, significat si abstrahuntur: et exibit gratis nullo argento, significat conjunctionem cum bono et non cum vero.$