9484. Vers. 10-16. Et faciant arcam lignorum schittim, duo cubiti et dimidius longitudo ejus, ac cubitus et dimidius latitudo ejus, ac cubitus et dimidius altidudo ejus. Et obduces illam auro puro, ab intra et ab extra obduces illam; et facies super illam limbum auri circumcirca Et fundes ei quattuor annulos auri, et dabis super quattuor angulos ejus et duo annuli super latere ejus uno, et duo annuli super latere ejus altero. Et facies vectes lignorum schittim, et obduces illos auro. Et induces vectes in annulos super lateribus arcae, ad portandum arcam in illis. In annulis arcae erunt vectes, {1}non removebuntur ab ea. Et dabis ad arcam testimonium, quod dabo ad te. `Et faciant arcam' significat intimum caelum: `lignorum schittim' significat justitiam: `duo cubiti et dimidius longitudo ejus' significat omne quoad bonum: `ac cubitus et dimidius latitudo ejus' significat plenum quoad verum: `ac cubitus et dimidius altitudo ejus' significat plenum quoad gradus: `et obduces illam auro puro, significat omnia illa fundanda super bono: `ab intra et ab extra obduces illam' significat ubivis: `et facies super illam limbum auri circumcirca' significat terminationem ex bono ne adeantur et laedantur a malis: `et fundes ei quattuor annulos auri' significat Divinum Verum conjunctum Divino Bono, quae undequavis circum: `et dabis super quattuor angulos ejus' significat firmitudinem: `et duo annuli super latere ejus uno, et duo annuli super latere ejus altero' significat conjugium veri cum bono ac boni cum vero: `et facies vectes lignorum schittim' significat potentiam inde: `et obduces illos auro' significat bonum undequaque: {2}et induces vectes in annulos' significat potentiam sphaerae Divinae: `super lateribus arcae' significat in ultimis: `ad portandum arcam in illis' significat ita caeli {3}existentiam et subsistentiam: `in annulis arcae erunt vectes' significat quod potentia consistet ex Divina sphaera boni et veri: `non removebuntur ab ea' significat in perpetuum absque mutatione: `et dabis ad arcam testimonium' significat Divinum Verum, quod est Dominus in caelo: `quod dabo ad te' significat ejus repraesentativum. @1 nec IT$ @2 i 1 Reg. viii 7, 8 cp n. 9502$ @3 cp n. 9500$