563. Notum est, quod consuetudo faciat alteram naturam, et quod inde facile sit uni, quod alteri difficile; ita quoque explorare se, et explorata confiteri. Quid facilius est mercenario, bajulo et colono, quam laborare brachiis a mane ad vesperam? cum vicissim honoratus et delicatus absque lassitudine et sudore idem non potest facere semisse horae. Facile est praecursori cum baculo et in mollibus calceis carpere viam [1]milliaris, quam assuefactus vehi curru, vix potest lente currere ab una platea in alteram. Omnis artifex assiduus operi suo facile et libenter id peragit, et abiens ab illo avet redire, cum alius ejusdem artificii gnarus, sed socors, vix tandem cogi ad illud potest: similiter omnis qui in aliqua functione aut in aliquo studio est, quid pietatis studioso facilius est quam orare ad Deum, et quid impietati emancipato difficilius? et vicissim. Quis sacerdos prima vice concionans coram rege, non timet ? at postquam instauratus est, intrepide pergit. Quid facilius est homini angelo quam elevare oculos ad caelum, et homini diabolo dejicere oculos ad infernum? at si hic hypocrita fit, potest similiter suspicere ad caelum, sed averso corde: finis propter quem, et inde habitus unumquemvis imbuit.