289. "Sedenti super throno, at Viventi in saecula saeculorum." Quod significet a quo omnia caeli et ecclesiae, et vita aeterna, constat ex significatione "throni," cum de Domino, quod in genere sit totum caelum, in specie caelum spirituale, et abstracte Divinum Verum procedens; et quia per hoc caeli existunt, ideo per "thronum" hic significantur omnia caeli et ecclesiae (de qua supra, n. 253 [a]); quod "Sedens super throno" sit Dominus, videatur etiam supra (n. 267, 268); et ex significatione "Viventis in saecula saeculorum," quod sit quod vita aeterna sit ab Ipso (de qua supra, n. 84); per "Viventem" enim significatur quod solus Vita, et inde quod omne vitae quod apud angelos et apud homines sit ab Ipso, et per "saecula saeculorum" significatur aeternum. Quod "saecula saeculorum" significent aeternum, est quia illa in mundo significant tempora quoad omnem eorum durationem; in caelo autem, ubi tempora qualia in mundo non dantur, significant aeternum: sensus enim litterae Verbi est ex talibus quae in mundo sunt, sensus autem spiritualis ejus ex talibus quae in caelo sunt, et hoc ob causam ut Divinum desinat in naturalia quae mundi sunt ut in sua ultima, ac in illis quiescat et super illis subsistat: inde est quod "saecula saeculorum" dicantur, et non dicatur aeternum.