487. (Vers. 2.) "Et Atrium quod extra Templum, ejice foras, et ne illud metiaris," significat quod status Ecclesiae in terris, qualis adhuc est, removendus sit, et non cognoscendus. - Per "atrium extra Templum," significatur Ecclesia in terris, quia haec extra Caelum est, quod est "Templum" (n. 486); per "ejicere foras" significatur removere, hic a Caelo, quia talis ejus status est; et per "non metiri" significatur non scrutari et cognoscere quale ejus (n. 486); causa sequitur, "quia datum est gentibus, et Civitatem sanctam conculcabunt mensibus quadraginta duobus." Quod per "atrium extra Templum" hic significetur Ecclesia in terris, qualis adhuc est, patet a sequentibus in hoc capite, ubi illa describitur per "magnam urbem, quae vocatur spiritualiter Sodoma et Aegyptus," in qua occisi jacuerunt bini Domini Testes, et quae postmodum in terrae motu magno cecidit, et in eo occisa sunt ibi nomina hominum millia septem; praeter plura ibi. Alioquin per "atrium" in Verbo significatur externum Ecclesiae; fuerunt enim bina atria, quae transiebantur dum intrarent ipsum Templum in Hierosolyma; et quia per "Templum" significabatur Ecclesia quoad internum ejus, ideo per II atria" significabatur Ecclesia quoad externum ejus; quare in atria admittebantur alienigenae, qui erant ex Gentibus, non autem in ipsum Templum: et quia externum Ecclesiae per "atrium" significatur, ideo etiam per illud significatur Ecclesia in terris, et quoque Caelum in ultimis, quia Ecclesia in terris est introitus in Caelum, similiter Caelum in ultimis. Hoc per "atrium" significatur in his locis:
"Beatus quem eligis, inhabitabit Atria Tua; saturabimur bono Domus Tuae, sancto Templi Tui" (Psalm. lxv. 5 (B.A. 4));
"Laudate Nomen Jehovae, qui stant in Domo Ipsius, in Atriis Domus Dei nostri" (Psalm. cxxxv. 1, 2);
"Quam amabilia Habitacula Tua Jehovah imo consumpta est anima mea erga Atria Jehovae" (Psalm. lxxxiv. 2, 3 (B.A. 1, 21);
"Intrate portas Ipsius in confessione, Atria Ipsius in laude" (Psalm. c. 4);
"Justus sicut palma florebit; plantati in Domo Jehovae, in Atriis De nostri germinabunt" (Psalm. xcii. 13, 14 (B.A. 12, 13));
"Bonus dies in Atriis Tuis prae millibus; elegi ad januam stare in Domo Dei mei" (Psalm. lxxxiv. 11 (B.A. 10)).(Praeter alibi, ut Psalm. xcvi. 8; Psalm. cxvi. 19{1}; Esaj. i. 12; cap. lxii. 9; Sach. iii. 7; Ezech. x. 3-5.) De Atriis Templi Hierosolymitani (1 Reg. vi. 3, 36{2});
De Atriis novi Templi (Ezech. xl. 17-31-44; cap. xlii. 1-14; cap. xliii. 4-7); Et de Atrio extra Tabernaculum (Exod. xxvii. 9-18). @1 19 pro "7"$ @2 36 pro "37"$
This page is part of 
© 2000-2001 The Academy of the New Church