530. "Et facta sunt fulgura, et voces, et tonitrua, et terrae motus, et grando magna," significat tunc in inferioribus ratiocinationes, commotiones, et falsificationes boni et veri. - Per "fulgura, voces et tonitrua significantur ratiocinationes, (n. 396); per "terrae motus" significantur mutationes status Ecclesiae (n. 331), hic commotiones; per "grandinem magnam" significantur falsificationes veri et boni (n. 399). Haec facta sunt in inferioribus, ubi adhuc mali commorati sunt, antequam Ultimum Judicium super illos factum est, nam dicitur in praecedente versu (18), "Venit tempus mortuos judicandi, et perdendi perdentes terram." Talia existunt in Mundo spirituum ex praesentia et influxu Caeli quod supra illos est.