579. (Vers. 4.) "Et adoraverunt Draconem, qui dedit potestatem Bestiae," significat agnitionem Doctrinae de Justificatione per Fidem absque Operibus Legis ab antesignanis et docentibus, qui fecerunt illam valere per receptionem a communi caetu. - Per "adorare" significatur pro sancto Ecclesiae agnoscere; per "Draconem" significatur doctrina de justificatione et salvatione per solam Fidem sine Operibus Legis (n. 537); per "Bestiam" hanc significatur communis caetus, quia Laici (n. 567); per "potestatem dare" significatur facere ut valeat per receptionem ab his (n. 575).