823. "Et Super capita Ipsius diademata multa," significat Divina vera Verbi ab Ipso. - "Super capite" significat{1} a Domino; per "caput" enim significatur sapientia ex amore, et ex capite regitur homo per sapientiam ex amore. Visa sunt "diademata super capite," quia Divina Vera Verbi, quae significantur per "diademata," ab Ipso sunt; quod "diademata" significent Divina Vera Verbi, videatur n. 231, 540: quod "caput," ubi de Domino, significet Divinam Sapientiam Divini Amoris, n. 47; quid porro "caput," n. 538, 568.{2} Divina Vera Verbi in mundo spirituali correspondent diadematibus, et ex correspondentia apparent ibi, et in Caelo super capite illorum qui sanctum habent Verbum. Inde est quod "diademata" significent Divina vera Verbi in Sensu literae ejus; causa est, quia Sensus literae translucet a Sensu spirituali et caelesti ejus, sicut diadema a luce. @1 significat pro "significatur"$ @2 568 pro "565"$