674. (Vers. 8.) "Et impletum est Templum fumo ex gloria Dei et virtute Ejus," significat intimum Caeli plenum Divino Vero spirituali et caelesti a Domino. -Per "Templum" significatur intimum Caeli, de quo supra (n. 669); per "fumum" significatur Divinum in ultimis, de quo sequitur; per "gloriam" significatur Divinum Verum spirituale (n. 249,629); et per "virtutem" significatur Divinum Verum caeleste (n. 373): inde per "impletum est Templum fumo ex gloria Dei et virtute Ejus," significatur intimum Caelum plenum Divino Vero spirituali et caelesti. Quod "fumus" significet Divinum verum in ultimis, est quia "ignis", a quo fumi sunt, significat amorem; "ignis Altaris holocausti" amorem caelestem (n. 395, 494) ; et "ignis Altaris suffitus" amorem spiritualem (n. 277, 392, 394): quod "fumus" illa significet, constare potest ex his locis:
"Creabit Jehovah super omne habitaculum montis Zionis nubem interdiu, ac Fumum et splendorem ignis noctu; nam super omni gloria obtegumentum" (Esaj. iv. 5);
Commoti sunt postes liminum a voce clamantium Seraphim. ac domus impleta est Fumo (Esaj. vi. 4);
"Ascendit Fumus suffituum cum precibus sanctorum{1} e manu Angeli coram Deo" (Apoc. viii. 4);
"Linum Fumigans non exstinguet; in veritatem proferet judicium" (Esaj. xlii. 3). Quod "fumus" in opposito sensu significet falsa concupiscentiarum, videatur supra (n. 422); et falsa oriunda ex fastu propriae intelligentiae (n. 452): praeterea "fumus" significat simile cum "nube" in multis locis. @1 sanctorum pro "Angelorum"$
674b. Et nemo potuit ingredi in Templum donec consummarentur septem plagae septem Angelorum" significat in eo gradu ibi, ut ultra non sustineri posset, et hoc usque dum post devastationem finis illius Ecclesiae visus. -Per quod "nemo posset ingredi in Templum" significatur quod intimum Caeli plenum esset Divino Vero Spirituali et Caelesti, in eo gradu ut ultra non sustineri posset; per "Templum" significatur, hic ut supra, intimum Caeli; per "donec consummarentur septem plagae septem Angelorum" significatur hoc usque post devastationem finis Ecclesiae (n. 658); et per "septem plagas septem Angelorum" significantur mala et falsa quae devastant Ecclesiam et faciunt finem ejus (n. 657).
This page is part of 
© 2000-2001 The Academy of the New Church