786. (Vers. 17.) "Et omnis gubernator, et omnis super navibus versans, et nautae, at quotquot mare operantur," significat illos qui vocantur Laici, tam qui in majore dignitate quam qui in minore constituti sunt, usque ad plebem, qui Religioso isti addicti sunt, ac illud amant et osculantur, aut corde agnoscunt et venerantur.--Actum est a versu 9 ad 16 de Clericis, qui ex Religioso illo in dominio fuerunt, et exercuerunt potestatem Divinam Domini, et per illam lucrati sunt mundum; nunc agitur de illis qui non in aliquo ordine ministerii sunt, at usque Religiosum illud amant et osculantur, aut corde agnoscunt et venerantur, qui nuncupantur Laici. Per "omnem gubernatorem" intelliguntur supremi ex illis, qui sunt Imperatores, Reges, Duces et Principes; per "omnem super navibus versantem" intelliguntur qui in variis functionibus sunt in majori et minori gradu; per "nautas" intelliguntur infimi qui vocantur plebs; per "quotquot mare operantur" intelliguntur omnes in genere qui Religioso isti addicti sunt, et illud amant et osculantur aut corde agnoscunt et venerantur. Quod hi et illi hic intelligantur, patet a serie rerum in Sensu spirituali; et ex significatione "super navibus," et "versantium super navibus" et "nautarum," et ex significatione "operantium mare." Per "gubernatores navium," et "versantium super illis," et "nautarum," non alii possunt intelligi quam qui apportant illa, quae supra vocantur merces, quae sunt quae in thesauraria sua colligunt, ut et possessiones, ac pro illis reportant benedictiones et beatificationes ut merita, et alia similia quae pro animabus suis desiderant. Et cum hi intelliguntur, patet quod per "omnem gubernatorem" intelligantur summi eorum, per "omnem versantem super navibus" omnes in officiis subordinati illis, et per "nautas" infimi. Quod per "naves" significentur merces spiritualis quae sunt cognitiones veri et boni, videatur supra (n. 406); hic merces naturales, et reportant spirituales, ut opinantur: quod per "quotquot mare operantur" intelligantur omnes quicunque sint, qui Religiosum illud amant et osculantur, aut corde agnoscunt et venerantur, est quia per "mare" significatur Religiosum illud, per "mare" enim significatur externum Ecclesiae (videatur supra, n. 238, 290, 403-405,{1} 470, 565 1/2,{2} 659, 661), et Religiosum hoc est mere externum. Similia significantur per haec apud Esajam:
"Sic dixit Jehovah Redemptor vester, Sanctus Israelis: Propter vos misi in Babelem, et dejiciam vectes omnes, quorum in Navibus clamor; sic dixit Jehovah, qui dedi in mari viam, et in aquis validis semitam" (xliii. 14, 16);
dicitur "clamor in navibus," ut quoque hic, quod "steterint e longinquo et e navibus clamaverint:" et quoque apud Ezechielem:
"Ad vocem clamoris Nauclerorum tuorum contremiscent suburbana, et descendent e navibus suis{3} omnes tenentes remum, omnes nautae et naucleri maris, et super te clamabunt amare" (xxvii. 28-30);
sed haec de devastatione Tyri, per quam significatur Ecclesia quoad cognitiones veri et boni. At sciendum est, quod non alii hic intelligantur, quam qui Religiosum illud amant et osculantur, aut corde agnoscunt et venerantur. At vero illi ex eodem Religioso, qui quidem agnoscunt illud, quia nati et educati in illud, et non sciunt aliquid de astutiis et laqueis eorum ad arrogandum sibi cultum Divinum, et ad possidendum omnia omnium in mundo, et usque bona faciunt ex sincero corde, et quoque oculos suos ad Dominum verterunt, hi post mortem inter beatos veniunt, nam instructi ibi recipiunt veritates, ac rejiciunt adorationem Papae et invocationem Sanctorum, et agnoscunt Dominum pro Deo Caeli et Terrae, elevantur in Caelum, et fiunt angeli: quare ex illis etiam sunt plures societates caelestes in mundo spirituali, quibus praeficiuntur honorati, qui similiter vixerunt. Datum est videre quod etiam quidam qui fuerunt Imperatores, Reges, Duces, et Principes, qui quidem agnoverunt Pontificem pro Supremo Ecclesiae, sed non pro Vicario Domini, et quoque agnoverunt aliqua ex Bullis Papalibus, sed tamen sanctum habuerunt Verbum, ac juste egerunt in administratione sua, [sint] praefecti{4} societatibus illis. Videantur de his aliqua in Continuatione de Ultimo Judicio et de Mundo Spirituali (n. 58 et 60), ab experientia relata. @1 403-405 pro "403, 404, 420"$ @2 565 1/2 pro "566"$ @3 suis pro "tuis"$ @4 [sint] praefecti pro "praefectos"$
This page is part of 
© 2000-2001 The Academy of the New Church