922. (Vers. 25.) "Et portae ejus non claudentur interdiu, nox enim non erit ibi," significat quod in Novam Hierosolymam jugiter recipiantur qui in veris ex bono amoris a Domino sunt, quia non ibi est falsum fidei. - Per quod "portae non claudentur interdiu" significatur quod jugiter admittantur qui volunt introire; per "interdiu" significatur jugiter, quia semper ibi lux (ut supra, vers. 11 et 23), et non aliqua nox, ut sequitur. Quod jugiter recipiantur qui in veris ex bono amoris a Domino sunt, est quia lux Novae Hierosolymae est verum ex bono amoris, et bonum amoris (est) a Domino, ut saepius supra ostensum est; et in illam lucem non intrare possunt alii, quam qui in veris ex bono a Domino sunt. Si intrant alieni, non recipiuntur, quia non concordant; et tunc vel sua sponte exeunt, quia non sustinent illam lucem, vel emittuntur. Per quod "nox non erit ibi" significatur quod non falsum fidei; per "noctem" enim significatur oppositum luci, et per "lucem" significatur verum ex bono amoris a Domino, ut dictum est; inde per "noctem" significatur id quod non ex bono amoris a Domino est, et hoc est falsum fidei. Falsum fidei etiam intelligitur per "noctem" apud Johannem:
Jesus dixit, "Me oportet operari opera Dei, quousque dies est; venit Nox quando nemo poterit Operari" (ix. 4{1});
et apud Lucam:
"In illa Nocte erunt duo super lecto uno; unus acceptabitur alter deseretur" (xvii. 34);
agitur ibi de ultimo tempore Ecclesiae, quando non erit nisi falsum fidei; per "lectum" significatur doctrina (n. 137). @1 4 pro "14"$
This page is part of 
© 2000-2001 The Academy of the New Church