12. In Apocalypsi, cap. vi., dicitur, Quod cum Agnus aperuit primum sigillum libri, exiret equus albus, et quod sedens super illo haberet arcum, cui data est corona: quod cum aperuit secundum sigillum, exiret equus rufus, et quod sedenti super illo data esset machaera magna; quod, cum aperuit tertium sigillum, exiret equus niger, et quod sedens super illo in manu teneret stateram; et quod, cum aperuit quartum sigillum, exiret equus pallidus, et quod nomen sedentis super illo esset Mors [(vers. 1-5, 7, 8)]. Quid haec significant, solum per sensum spiritualem potest evolvi; et plene evolvitur, dum scitur quid significat "aperitio sigillorum," quid "equus," et quid reliqua. Per illa describuntur successivi status ecclesiae quoad intellectum Verbi, a principio ad finem ejus: per "aperitionem sigillorum libri ab Agno," significatur manifestatio illorum statuum ecclesiae a Domino; per "equum" intellectus Verbi; per "equum album" intellectus veri ex Verbo in primo ecclesiae statu; per "arcum" sedentis super illo equo, doctrina charitatis et fidei pugnans contra falsa; per "coronam," vita aeterna victoriae praemium; per "equum rufum," significatur intellectus Verbi deperditus quoad bonum in secundo ecclesiae statu; per "machaeram magnam," falsum pugnans contra verum: per "equum nigrum" significatur intellectus Verbi deperditus quoad verum in tertio ecclesiae statu; per "stateram" aestimatio veri tam parva ut vix aliqua: per "equum pallidum" significatur intellectus Verbi nullus ex malis vitae et inde falsis in quarto seu ultimo ecclesiae statu, et per "mortem" damnatio aeterna. Quod talia in sensu spirituali per illa significentur, non apparet in sensu litterae seu naturali; quare nisi sensus spiritualis semel aperiretur, Verbum quoad hoc et quoad reliqua in Apocalypsi, foret clausum, adeo ut tandem nullus sciret in quo Sanctum Divinum ibi lateret. Pariter quid significatur per "quatuor equos" et per "quatuor currus exeuntes ab inter duos montes aeris," apud Sachariam (cap. vi. 1-8).