102. Creditur quod Dominus quoad Humanum non modo fuerit, sed etiam sit filius Mariae, sed in hoc orbis Christianus hallucinatur. Quod fuerit filius Mariae verum est, sed quod adhuc sit, non verum est, nam per actus redemptionis exuit humanum ex matre et induit Humanum ex Patre; inde est quod Humanum Domini sit Divinum, et quod in Ipso Deus sit Homo et Homo Deus. Quod exuerit humanum ex matre, ac induerit Humanum ex Patre, quod est Divinum Humanum, videri potest ex eo, quod Ipse Mariam nusquam vocaverit suam matrem, ut constare potest ex his:
"Dixit mater Jesu ad Ipsum, Vinum non habent. Dixit illi Jesus, Quid Mihi et tibi, mulier? Nondum venit hora Mea" (Joh. ii. [3,] 4). et alibi, "Jesus e cruce videt matrem, et discipulum adstantem quem amabat; dicit matri suae, Mulier, ecce filius tuus; deinde dicit discipulo, Ecce mater tua" (Joh. xix. 26, 27);
et semel quod non agnoverit illam, "Nuntiatum est" Jesu "a dicentibus, Mater Tua et fratres Tui foris stant, et volunt Te videre." Jesus "respondens dixit, ....Mater Mea et fratres Mei hi sunt, qui audiunt Verbum Dei et faciunt illud" (Luc. viii. 20, 21; Matth. xii. 46-[1]50; Marc. iii. 31-35);
ita Dominus non vocavit illam matrem, sed "mulierem," et dedit illam Johanni in matrem. In aliis locis vocatur illa mater Ipsius, sed non ab Ipsius ore. [2.] Hoc etiam confirmatur per hoc, quod non agnoverit Se esse Filium Davidis; legitur enim apud Evangelistas, "Interrogavit Jesus Pharisaeos, dicens, Quid vobis videtur de Christo? Cujus Filius est? Dicunt Ipsi, Davidis. Dixit illis, Quomodo ergo David illum in spiritu Dominum" suum "vocat, dicens, Dixit Dominus Domino meo, Sede a dextris meis, donec posuero inimicos tuos scabellum pedum tuorum Si ergo David vocat Ipsum Dominum, quomodo filius ejus est Et nemo potuerat Ipsi respondere verbum" (Matth. xxii. [1]41-46; Marc. xii. 35-37; Luc. xx. 41-44; Psalm. cx. 1). [3.] His adjiciam hoc novum, "Semel mihi datum est loqui cum Maria Matre. Praeteriit quondam, et visa est in caelo supra caput meum in vestitu albo ut ex serico: et tunc paulum morata dixit, quod Mater Domini fuerit, qui a se natus, sed quod factus Deus exuerit omne humanum ex illa, et quod ideo adoret Ipsum ut suum Deum, et quod nolit ut quisquam Ipsum pro Filio suo agnoscat. quia in Ipso omne Divinum est." Ex his nunc elucet haec veritas, quod ita Jehovah sit Homo ut in primis etiam in ultimis, secundum haec: "Ego sum Alpha et Omega, Principium et Finis...; Ille qui Est, qui Fuit, et qui Venturus est, Omnipotens" (Apoc. i. 8, 11). Johannes cum vidit Filium hominis in medio septem candelabrorum, "cecidit ad pedes Ipsius sicut mortuus; sed imposuit dextam suam super" illo, "dicens, ...Ego sum Primus et Ultimus" (Apoc. i. 13, 17; xxi. 6). "Ecce venio cito, ...ut dem unicuique secundum opus ejus. ...Ego sum Alpha et Omega, Principium et Finis, Primus et Ultimus" (Apoc. xxii. 12, 13). Et apud Esaiam, "Sic dixit Jehovah Rex Israelis, et Redemptor ejus Jehovah Zebaoth, Ego sum Primus et Ultimus" (xliv. 6; xlviii. 12).
This page is part of 
© 2000-2001 The Academy of the New Church