1952. Vers. 13, 14. Et vocavit nomen Jehovae loquentis ad se, Tu Deus videns me, quia dixit, Num etiam hic vidi post videntem me? Propterea vocavit fontem, fons Vivo videnti me, ecce inter Kadesh et inter Bared. `Et vocavit nomen Jehovae loquentis ad se' significat statum Interioris Hominis Domini cum illa cogitavit: `Tu Deus videns me' significat influxum: `quia dixit, Num etiam hic vidi post videntem me?' significat influxum in exterioris hominis vitam absque rationali medio: `propterea vocavit fontem' significat statum veri inde: `fons Vivo videnti me' significat verum ita conspicuum: `ecce inter Kadesh et inter Bared' significat qualitatem.