3604. Vers. 41-45. Et odit Esau Jacobum propter benedictionem, qua benedixit illi pater illius; et dixit Esau in corde suo, Appropinquabunt dies luctus patris mei, et occidam Jacobum fratrem meum. Et indicatum Rebeccae verba Esavi filii sui majoris, et misit, et vocavit ad Jacobum filium suum minorem, et dixit ad illum, Ecce Esau frater tuus consolans se tibi ad occidendum te. Et nunc fili mi, ausculta voci meae, et surge, fuge tibi ad Laban fratrem meum Haranem. Et commoreris cum eo diebus aliquibus, donec recedit excandescentia fratris tui. Usque recedat ira fratris tui a te, et obliviscatur ejus quod fecisti illi, et mittam et accipiam te exinde; quare orbabor etiam ambobus vobis die uno? `Odit Esai Jacobum propter benedictionem, qua benedixit illi pater illius' significat quod bonum naturale aversaretur conjunctionem veri inversam: `et dixit Esau in corde suo' significat cogitationem: `Appropinquabunt dies luctus patris mei, et occidam Jacobum fratrem meum' significat inversionem et privationem vitae veri a se: `et indicatum Rebeccae verba Esavi filii sui majoris' significat perceptionem Domini ex Divino Vero de animo boni naturalis tunc: `et misit, et vocavit ad Jacobum filium suum minorem, et dixit ad illum' significat statum apperceptionis affectionis veri ex influxu per Verum Divinum: `Ecce Esau frater tuus consolans se tibi ad occidendum te' significat animum invertendi statum et privandi verum vita a se: `et nunc fili mi, ausculta voci meae, et surge' significat moram adhuc: `fuge tibi ad Laban fratrem meum Haranem' significat ad affectionem boni externi seu corporei: `et commoreris cum eo diebus aliquibus' significat successivum: `donec recedit excandescentia fratris tui' significat usque dum status advertit: `usque recedat ira fratris tui a te' significat successivum status apud bonum naturale: `et obliviscatur ejus quod fecisti illi' significat habitum ex mora: `et mittam et accipiam te exinde' significat tunc finem: `quare orbabor etiam ambobus vobis die uno?' significat quod aliter non conjunctio.