5271. Vers. 28-32. Hoc verbum quod locutus sum ad Pharaonem, quod Deus faciens, videre fecit Pharaonem. Ecce septem anni veniunt, abundantia annonae magna in omni terra Aegypti. Et surgent septem anni famis post eos, et oblivioni dabitur omnis abundantia annonae in terra Aegypti, et consumet fames terram. Et non cognoscetur abundantia annonae in terra a coram fame illa posthac, quia gravis ea valde. Et super iterari somnium ad Pharaonem duabus vicibus, quia stabilitum verbum a cum Deo, et festinans Deus facere illud. `Hoc verbum quod locutus sum ad Pharaonem' significat quod cogitavit naturale e caelesti spiritualis: `quod Deus faciens' significat de proviso: `videre fecit Pharaonem' significat apperceptionem naturalis: `ecce septem anni veniunt' significat status providentiae: `abundantia annonae magna in omni terra Aegypti' significat multiplicationem veri in utroque naturali: `et surgent septem anni famis post eos' significat status sequentes cum defectus veri: `et oblivioni dabitur omnis abundantia annonae in terra Aegypti' significat remotionem veri et privationem ejus apparentem in utroque naturali: `et consumet fames terram' significat usque ad desperationem: `et non cognoscetur abundantia annonae in terra' significat quod nihil de vero quod prius, appercipietur ibi: `a coram fame illa posthac, quia gravis ea valde' significat ob defectum talem: `et super iterari somnium ad Pharaonem duabus vicibus' significat quia {1}provisum de utroque naturali: `quia stabilitum verbum a cum Deo' significat quod sit Divinum: `et festinans Deus facere illud' significat cum omni eventu. @1 Note provisum here A I, but in 5282 praevisum$