7694. Vers. 16-20. Et festinavit Pharao ad vocandum Moschen et Aharonem, et dixit, Peccavi Jehovae Deo vestro, et vobis. Et nunc remitte quaeso peccatum meum, tantum hac vice, et supplicate Jehovae Deo vestro, et removeat desuper me tantum mortem hanc. Et exivit a cum Pharaone, et supplicavit ad Jehovam. Et convertit Jehovah ventum maris validum valde, et sustulit locustam, et conjecit illam mare Suph, non relicta locusta una in omni termino Aegypti. Et obfirmavit Jehovah cor Pharaonis, et non dimisit filios Israelis. `Et festinavit Pharao ad vocandum Moschen et Aharonem' significat timorem tunc pro vero (c)a Divino: `et dixit, Peccavi Jehovae Deo vestro, et vobis' significat confessionem quod non (x)oboediverit Divino (x)ac vero: `et nunc remitte quaeso peccatum meum, tantum hac vice' significat ne respiciant ad inoboedientiam: `et supplicate Jehovae Deo vestro' significat intercessionem: `et removeat desuper me tantum mortem hanc' significat ut falsum hoc non cruciet: `et exivit a cum Pharaone' significat separationem: `et supplicavit ad Jehovam' significat intercessionem:' et convertit Jehovah ventum maris validum valde' significat cessationem influxus Divini per caelum: `et sustulit locustam' significat status illius finem: `et conjecit illam in mare Suph' significat in infernum: `non relicta locusta una in omni termino Aegypti' significat quod falsa illa in extremis non magis apparerent: et obfirmavit Jehovah cor Pharaonis' significat quod infestantes se obstinarent: `et non dimisit filios Israelis' significat ut non relinquerent illos ab Ecclesia spirituali.