844. Ab hoc versu ad sextum agitur de primo statu hominis hujus Ecclesiae post tentationem; et quae in hoc versu, significant cessationem tentationis. Actum est prius de tentatione ejus quoad voluntaria, tum de tentatione ejus quoad intellectualia; quod cessaverit tentatio quoad voluntaria, significatur per quod 'obturati sint fontes abyssi'; et quod quoad intellectualia, per quod 'cataractae caeli'; quae quod talia significent, prius dictum et ostensum est cap. praec. vii ad vers. 11; et quod 'imber' ipsam tentationem, etiam ibi vers. 12, quare iis confirmandis non amplius immorandum.