1172. Quod per 'Dedanem' significentur cognitiones caelestium inferiorum quae sunt in ritualibus, constat a sequentibus in Verbo locis; apud Ezechielem, Filii Dedanis negotiatores tui, insulae multae {1}mercatura manus tuae, cornua eboris, et ebena adduxerunt honorarium tuum, xxvii 15; 'cornua eboris et ebena' sunt in sensu interno bona exteriora quae sunt cultus seu ritualium: apud eundem, Dedan negotiatrix tua in vestibus libertatis pro curru; Arabia et omnes principes Kedar, xxvii 20, 21; ubi 'vestes libertatis' pro curru similiter sunt bona exteriora seu ritualium: apud Jeremiam, Putida facta est sapientia eorum; fugite, averterunt se, in profundum demiserunt se ad habitandum, habitatores Dedanis, xlix [7,] 8;