8177. Vers. 15-18. Et dixit Jehovah ad Moschen, Quid clamas ad Me? loquere ad filios Israelis, et proficiscantur. Et tu tolle baculum tuum, et extende manum tuam super mare, et diffinde illud, et veniant filii Israelis in medium maris in arido. Et Ego, ecce Ego indurans cor Aegyptiorum, et venient post illos, et glorificabor in Pharaone, et in omni exercitu illius, in curribus illius, et in equitibus illius. Et scient Aegyptii quod Ego Jehovah, in glorificari Me in Pharaone, in curribus illius, et in equitibus illius. `Et dixit Jehovah ad Moschen' significat exhortationem: `Quid clamas ad Me?' significat quod intercessione non opus: `loquere ad filios Israelis' significat influxum et perceptionem: `et proficiscantur' significat successivum continue usque dum praeparati: `et tu tolle baculum tuum' significat potentiam Divini Veri: `extende manum tuam super mare' significat dominium potentiae ubi infernum falsi ex malo: `diffinde illud' significat dissipationem falsi inde: `et (x)veniant filii Israelis in medium maris in arido' significat ut transeant illi qui ab Ecclesia spirituali tuto et absque influxu falsi: `et Ego, ecce Ego indurans cor Aegyptiorum' significat obstinationem falsi ex malo: `et venient post illos' significat conatum violentiam inferendi per influxum falsi a malo: `et glorificabor in Pharaone, et in omni exercitu illius, et in curribus illius, et in equitibus illius' significat quod visuri effectum dissipationis falsi ac ratiociniorum ex Divino Bono Divini Humani Domini: `et scient Aegyptii quod Ego Jehovah' significat ut notum sit quod Dominus solus Deus, et praeter Ipsum non alius: `in glorificari Me in Pharaone, in curribus illius, et in equitibus illius' significat, ut supra, ex eo quod visuri effectum dissipationis falsi, et doctrinalium ejus, et ratiociniorum, ex solo Domino.