9395. `Et dimidium sanguinis sparsit super altare': quod significet Divinum Verum a Domini Divino Humano, constat ex significatione `sanguinis' quod sit Divinum Verum, de qua mox supra n. 9393, et ex significatione `altaris' quod sit repraesentativum Divini Humani Domini, de qua n. 921, 2777, 2811, 4489, inde principale repraesentativum cultus Domini, n. 4541, 8935, 8940; quod per hoc `dimidium sanguinis' quod super altare sparsum est, significetur Divinum Verum procedens a Divino Humano Domini, et per alterum `dimidium sanguinis' quod super populum est sparsum, vers. seq. 8, significetur Divinum illud Verum (x)receptum ab homine Ecclesiae; causa est quia foedus iniebatur, et per `foedus' significatur conjunctio, n. 665, 666, 1023, 1038, 1864, 1996, 2003, 2021, 6804, 8767, 8778, et conjunctio Domini cum homine Ecclesiae fit cum Divinum Verum, quod a Domino procedit, ab homine recipitur; inde patet cur sanguis adhibitus sit, et cum sparsus super altare et super populum, dictus sit sanguis foederis, vers. 8.