9669. Vers. 31-33. Et facies velum hyacinthino et purpura et coccineo dibapho et byssino contexto, opere excogitatoris faciet illud, cherubis. Et dabis illud super quattuor columnas schittim obductas auro, et unci earum auro super quattuor basibus argenti. Et dabis velum sub ansulis, et induces illuc ab intra velum arcam testimonii, et distinguat velum vobis inter sanctum et inter sanctum sanctorum. `Et facies velum' significat medium uniens hoc caelum et caelum intimum, ita bonum spirituale cum bono caelesti: `hyacinthino et purpura et coccineo dibapho et byssino contexto' significat bona amoris et fidei ibi conjuncta: `opere excogitatoris faciet illud' significat intellectuale: `cherubis' significat custodiam ne commisceantur: `et dabis illud super quattuor columnas schittim' significat bonum meriti, quod solius Domini, conjungens et sustentans: `obductas auro' significat ibi repraesentativum {1}: `et unci earum auro' (d)significat conjunctionis modos per bonum: `super quattuor basibus argenti' significat conjunctionis potentiam per verum: `et dabis velum sub ansulis' significat conjunctionis facultatem et inde actualitatem; `et induces illuc ab intra velum arcam testimonii' significat existentiam caeli intimi intra illud medium uniens: `et distinguat velum vobis inter sanctum et inter sanctum sanctorum' significat inter bonum spirituale, quod est bonum charitatis erga proximum, et bonum fidei in Dominum, et inter bonum caeleste, quod est bonum amoris in Dominum, et bonum amoris mutui. @1 cp ii. 9675$