"Et Jesus edentibus illis, accipiens panem, et benedicens, fregit et dedit discipulis, et dixit, Accipite, comedite, [1]hoc est Corpus meum. Et accipiens poculum, et gratias agens dedit illis, dicens, Bibite ex eo omnes; hoc est Sanguis meus, ille Novi Testamenti, qui pro multis effunditur [[2]in remissionem peccatorum]" (Matth. xxvi. 26-28; Marc. xiv. 22-24; Luc. xxii. 19, 20). DOCTRINA DOMINI DE SUA CARNE ET SUO SANGUINE, DEQUE PANE ET VINO. "Operamini cibum, non qui perit, sed cibum, qui manet in vitam aeternam, quem Filius hominis vobis dabit. .... Amen, amen, dico vobis, non Moses dedit vobis panem e caelo, sed Pater meus dat vobis panem e caelo verum: Panis namque Dei est, qui descendit de caelo, et vitam dat mundo. .... Ego sum Panis vitae; qui venit ad Me, non esuriet, et qui credit in Me, non sitiet unquam. .... Ego sum Panis, qui descendit de caelo. .... Amen, amen, dico vobis, qui credit in Me, habet vitam aeternam: Ego sum Panis vitae. Patres vestri comederunt manna in deserto, et mortui sunt: hic est Panis, qui e caelo descendit, ut quis ex eo comedit vivat et non moriatur. Ego sum Panis vivens, qui e caelo descendit; si quis comederit ex hoc Pane, vivet in saeculum; .. Panis, quem Ego dabo, Caro mea est, quam Ego dabo pro mundi vita. .... Amen, amen, dico vobis, Nisi comederitis carnem Filii hominis, et biberitis Ejus Sanguinem, non habebitis vitam in vobis. Qui manducat meam carnem, et bibit meum Sanguinem, habet vitam aeternam, et Ego resuscitabo illum in extrema die: nam Caro mea est vere cibus, et Sanguis meus est vere potus. Qui manducat meam carnem, et bibit meum Sanguinem, in Me manet, et Ego in illo" (Joh. vi. 27, 32, 33, 35, 41, 47-51, 53-56).