[2] (Continuatio [de Vita Animalium].) His praemissis dicetur quid Anima Bestiarum. Anima bestiarum in se spectata est spiritualis; affectio enim, qualiscunque sit, bona aut mala, est spiritualis; est enim derivatio alicujus amoris, ac originem trahit ex luce et calore quae procedunt a Domino ut Sole; et quicquid inde procedit, est spirituale. Quod malae affectiones, quae concupiscentiae vocantur, etiam inde sint, patet ex illis quae de malis amoribus et inde insanis cupiditatibus geniorum et spirituum infernalium prius dicta sunt.

[3] Bestiae et ferae quarum animae similes affectiones malae sunt, non sunt ex principio creatae; sicut mures, serpentes venenati, crocodili, basilisci, viperae, et similes, cum insectis variis noxiis; sed ortae sunt cum inferno, in stagnis, paludibus, aquis putidis et fetidis, et ubi sunt effluvia cadaverosa, stercorea et urinosa, cum quibus maligni amores societatum infernalium communicant: quod communicatio cum talibus sit, ab experientia mihi scire datum est. Inest etiam omni spirituali vis plastica, ubi exhalationes homogeneae in Natura adsunt, et quoque inest omni spirituali vis propagatrix; format enim non modo organa sensuum et motuum, sed etiam organa prolificationis per uteros vel per ova. Sed a principio solum creatae sunt bestiae utiles et mundae, quarum animae sunt affectiones bonae.

[4] At sciendum est quod animae bestiarum non sint spirituales in eo gradu in quo sunt animae hominum, sed sunt spirituales in gradu inferiore: dantur enim gradus spiritualium; et affectiones gradus inferioris, tametsi ex origine sua spectatae sunt spirituales, usque dicendae sunt naturales; ita dicendae, quia sunt similes affectionibus hominis naturalis. Sunt in homine tres gradus affectionum naturalium, similiter in bestiis; in infimo gradu sunt insecta varii generis, in superiori sunt volatilia caeli, et in adhuc superiori sunt bestiae terrae quae a principio creatae sunt.