Continuatio de vastatione
Visa etiam est vastatio illorum qui confirmaverunt se in Christianismo de polygamia, qui etiam binas uxores habebant, erant simul in uno tractu satis extenso ad aliquot millia, repraesentabantur per id quod a tergo jacerent pedibus extensis; etiam illi omnes eversi et conjecti in infernum, cum toto illo tractu, et ibi illi perdiderunt membra sua genitalia, et viverent absque illis; in persuasione de illa re forte erant, ex causis variis, ut quod extra Christianismum fere ubivis in Asia, quod in Veteri Testamento Judaei, quod non rationem invenerint constabiliendi conjugium duorum; sed quia Christiani erant, et illi in ea luce, et quia Verbum apud illos, quod est conjugium coeleste, et ibi interiora vera, ideo illi ita vastati sunt.
